बीड : अल्पवयीन मुलीवरील बलात्कारप्रक रणी पोलीस कर्मचारी, निवृत्त नायब तहसीलदारासह ८ जणांना अटक

बीड – काही दिवसांपूर्वी बीड जिल्ह्यातील अंबाजोगाईत एका अल्पवयीन मुलीवर ४०० जणांनी अत्याचार केल्याची घटना उघडकीस आल्यानंतर मोठी खळबळ उडाली होती. या प्रकरणामध्ये मागील २४ तासांत एका पोलीस कर्मचाऱ्यासह होमगार्ड, सेवानिवृत्त नायब तहसीलदारासह ८ जणांना पोलिसांनी अटक केली आहे. पोलीस कर्मचारी, होमगार्ड आणि निवृत्त सरकारी अधिकाऱ्याला अटक करण्यात आल्याने खळबळ उडाली आहे.
अंबाजोगाई शहरामध्ये असलेल्या पाण्याच्या टाकीजवळ राहणाऱ्या अल्पवयीन मुलीवर ४०० जणांनी अत्याचार केल्याचे प्रकरण उघडकीस आले होते. या प्रकरणात ८ नोव्हेंबर रोजी गुन्हा दाखल झाल्यानंतर एक-एक धक्कादायक बाबी पुढे येऊ लागल्या. ज्या अल्पवयीन मुलीवर अत्याचार झाला, ती निराधार अवस्थेमध्ये एकटीच असल्याचा गैरफायदा अनेकांनी उचलला. कधी पैशाचे आमिष तर कधी जबरदस्ती, तर कधी वेगवेगळ्या आमिषांचा बळी ठरलेल्या या अल्पवयीन पीडितेवर ४०० जणांनी अत्याचार केला. गुन्हा दाखल झाल्यानंतर १० ते १२ जणांना पोलिसांनी ताब्यातही घेतले आहे.
अत्याचार करणाऱ्यांमध्ये पोलीस कर्मचाऱ्याचा समावेश असल्याचे न्यायालयाच्या निदर्शनास आल्यानंतर न्यायालयाने पोलिसांवरच ताशेरे ओढत आरोपीला अटक का होत नाही? असा प्रश्न उपस्थितीत केला होता. न्यायालयाच्या याच भूमिकेमुळे पोलिसांनी गेल्या २४ तासांमध्ये ८ जणांना अटक केली आहे. अटक करण्यात आलेल्यांमध्ये एक पोलीस कर्मचारी, एक होमगार्ड, लॉज चालक असलेले एक माजी नायब तहसीलदार आणि इतर एक लॉज चालक, एका लॉजचा व्यवस्थापक अशा ८ जणांचा समावेश आहे. या प्रकरणाचा अधिक तपास अप्पर पोलीस अधीक्षक कविता नेरकर या करीत आहेत.