अग्रलेख : सावधगिरी आवश्यकच


नवीन वर्षातील ३ जानेवारीपासून १५ ते १८ वयोगटांतील मुलांच्या लसीकरणाचा निर्णय केंद्र सरकारने घेतला आहे. ही अत्यंत चांगली बाब म्हणावी लागेल. मावळत्या वर्षाला निरोप देताना पंतप्रधानांनी त्याची घोषणा केली आणि कुठेतरी सर्वसामान्य जनतेला दिलासा दिला आहे. अर्थात तरीही तिसºया लाटेचा धोका पूर्णपणे टळला आहे, असे म्हणता येणार नाही. खरंतर सरत्या वर्षासरशी कोरोनाचे संकट संपुष्टात येण्याची व्यक्त केली जात असलेली शक्यता ओमिक्रॉन व्हेरिएंटच्या नव्या संकटामुळे पार मावळली आहे. जगभरात या नव्या व्हेरिएंटमुळे कोरोना रुग्णांची संख्या वाढू लागली आहे, ते पाहता चिंता वाटू लागली आहे.

नव्या व्हेरिएंटच्या संसर्गामुळे अवघ्या दीड ते तीन दिवसांमध्ये रुग्णसंख्या दुप्पट होत आहे. हा कल असाच राहिल्यास जानेवारीअखेर ते फेब्रुवारीच्या प्रारंभापर्यंत जगभरातील बहुतेक देशांतील रुग्णसंख्येत कमालीची वाढ होण्याची व इस्पितळे रुग्णांनी ओसंडून वाहू लागण्याचा धोका आहे. भारतामध्येही ओमिक्रॉन रुग्णांची संख्या बघता बघता वाढते आहे आणि प्रमुख शहरांतून हे लोण आता छोट्या शहरांपर्यंत येऊन ठेपलेले दिसते. विदेशात राहणारे अनेक जण नाताळनिमित्त मोठ्या संख्येने विविध राज्यांत परतलेले असल्याने हे लोण सगळीकडेपसरायला वेळ लागणार नाही. एकीकडे विदेशातून विशेषत: ब्रिटन आणि युरोपीय देशांतून मायदेशी परतलेले आणि दुसरीकडे ख्रिसमस, नववर्षाच्या स्वागतासाठी लोंढ्यांनी लोटू लागलेले देशी पर्यटक यामुळे देशभरातील पर्यटन व्यवसायावर दुहेरी संकट आहे.
यावर्षी एप्रिल-मेमध्ये आलेल्या कोरोनाच्या दुस‍ºया लाटेत राज्यात काय हलकल्लोळ माजला त्याच्या आठवणीही आज नकोशा वाटतात. कुटुंबेच्या कुटुंबे त्या दुस‍ºया लाटेच्या तडाख्यात सापडली. तेव्हाही मागच्या वर्षअखेरीस असाच कोरोना संपुष्टात आल्याचा भ्रम जनतेमध्ये पसरलेला होता. त्यातून निष्काळजीपणा वाढला होता, मात्र दुसरी लाट एप्रिल, मे महिन्यात अशी उफाळली की जनता हादरून गेली. आता तर निवडणुकांचे दिवस आहेत. कोणाचा पायपोस कोणात नाही अशी परिस्थिती आहे. त्यामुळे अशावेळी कोरोनाची तिसरी लाट धडकली, तर काय होईल याची कल्पनाही करवत नाही. अशा परिस्थितीत जलदगतीने बालकांचे लसीकरणाचा निर्णय केंद्राने घेतला आहे ही त्यातल्या त्यात जमेची बाजू आहे.

डेल्टा व्हेरिएंटच्या तुलनेत ओमिक्रॉन सौम्य असल्याचा निष्कर्ष तज्ज्ञांनी सुरुवातीला काढला होता, परंतु डेल्टा व्हेरिएंटच्या तुलनेत ओमिक्रॉनची संसर्गजन्यता तब्बल सत्तर पट अधिक आहे. यावरून संसर्गाचा वेग लक्षात येईल. मानवी पेशीत शिरकाव करण्यास कोरोनाचा हा व्हेरिएंट अधिक सरावलेला आहे. त्यामुळे अशा परिस्थितीत सार्वजनिक वावरावर पुन्हा कडक निर्बंध आणले गेले नाहीत तर बघता बघता होत्याचे नव्हते, व्हायला वेळ लागणार नाही. नेत्यांना निवडणुकांत अधिक रस आहे. त्यामुळे हे निर्बंध घालण्यात चालढकल होईल हे उघड आहे. परंतु जे आवश्यक आहे, त्याचा आग्रह जनतेलाही धरावा लागेल. अन्यथा परिस्थिती पुन्हा बिघडेल आणि एकदा बिघडलेली परिस्थिती पुन्हा पूर्वपदावर येईस्तोवर काय वाताहत आणि पडझड होते, त्याचा अनुभव यापूर्वीच्या दोन लाटांत आपण घेतलेलाच आहे. काही राज्यांत रात्रीची जमावबंदी सुरू केली आहे. मध्य प्रदेश, उत्तर प्रदेश, महाराष्ट्रात रात्रीची जमावबंदी आहे. पण मुंबईत एकटेएकटे म्हणून होणारी गर्दीच चिंतेची बाब आहे. रात्री ९ नंतरही लोकल गच्च भरून जात आहेत. त्यात एखादा जरी संसर्गीत झालेला असला, तरी त्याची चिंता ही आहेच.
ओमिक्रॉनच्या वाढत्या प्रसाराला रोखण्यात केंद्र सरकारची भूमिकाही अत्यंत महत्त्वाची आहे. केवळ जनतेला अनावश्यक प्रवास टाळण्याचे आवाहन करणे पुरेसे नाही. काही राज्य सरकारांनी आंतरराष्ट्रीय व देशांतर्गत प्रवासावर कडक निर्बंध घातले, परंतु सर्वत्र त्याबाबत एकवाक्यता दिसत नाही. त्यामुळे या परिस्थितीत केंद्राने हस्तक्षेप करून ओमिक्रॉन फैलाव रोखण्यासंदर्भातील सुस्पष्ट दिशानिर्देश राज्य सरकारांना द्यावे लागतील आणि त्यांची योग्य कार्यवाही होते आहे हेही पाहावे लागेल. नागरिकांना लसीकरणाचा बुस्टर डोस म्हणजे वर्धक मात्रा देण्यासंदर्भात योग्य निर्णय घ्यावा लागणार आहे. मुलांच्या लसीकरणाची योजना जाहीर केली असली, तरी त्याचे नियोजन महत्त्वाचे असणार आहे. मागील कोरोना फैलावावेळी केंद्रीय नेते निवडणुकांच्या प्रचारात दंग होते, त्यामुळे योग्य निर्णय घेण्यास वेळ लागला होता. तसे यावेळी होणार नाही अशी अपेक्षा आहे. जनता पुन्हा बेफिकिर आणि बेदरकार बनलेली आहे. तिला या नव्या व्हेरिएंटचे गांभीर्य समजावून द्यावे लागेल. आरोग्य यंत्रणा सुस्तावलेली आहे. तिला पुन्हा युद्धपातळीवर सुसज्ज करावे लागेल. खाटांच्या उपलब्धतेपासून प्राणवायूपर्यंतची सज्जता ठेवावी लागेल. केंद्र आणि राज्य सरकारच्या समन्वयाने आणि जनतेच्या संपूर्ण सहयोगानेच ओमिक्रॉनवर मात करता येऊ शकते. त्यामुळे कोरोना महामारी संपल्याचा निर्माण झालेला भ्रम दूर सारून पुन्हा त्याच्याशी दोन हात करायला सज्ज व्हावे लागेल! तिसरी लाट केव्हा येईल आणि सुरू होईल हे समजणारही नाही. मागच्या दोन दिवसांत नुसत्या मुंबईतील रुग्णांची संख्या झपाट्याने वाढत आहे. हे पाहता आता लहान मुलांचे लसीकरण निश्चित झाले असले, तरी सावधगिरी बाळगलीच पाहिजे.

About Editor

अवश्य वाचा

उखाणा

सवाष्णीने आपल्या पतीचे नाव घेण्याची एक पारंपरिक शैली ही महाराष्ट्राची ओळख आहे. लग्नात किंवा सण-समारंभात …