राष्ट्रीय खो-खो स्पर्धा : महाराष्ट्राचा पंजाब व छत्तीसगडवर विजय

उना – ३१व्या किशोर-किशोरी राष्ट्रीय अजिंक्यपद खो-खो स्पर्धेत महाराष्ट्राच्या किशोर संघाने पंजाब व छत्तीसगडवर तर किशोरी संघाने केरळवर विजय मिळवत विजयी घोडदौड कायम राखली. सोमवारी किशोरांच्या सामन्यात महाराष्ट्राच्या संघाने पंजाबवर विजय मिळवताना १८-०७ असा एक डाव ११ गुणांनी धुव्वा उडवला. महाराष्ट्राच्या आशिष गौतमने नाबाद ३:४० मि. संरक्षण केलं, अथर्व पाटीलने ३:०० मि. संरक्षण करून ३ गडी बाद केले. जितेंद्र वसावेने २:४० मि. संरक्षण करून ३ गडी बाद केले. सोत्या वळवीने ४ गडी बाद करून संघाला मोठा विजय मिळवून दिला, तर पंजाबच्या सन्नी (३ गडी) व गुविंदर सिंग (२ गडी ) यांनीच चांगला खेळ केला. महाराष्ट्राच्या दुसऱ्या सामन्यात किशोर संघाने छत्तीसगडचा १७-०७ असा एक डाव १० गुणांनी पराभव केला. यामध्ये महाराष्ट्राच्या आराध्य वसावेने २:२० मि. संरक्षण करत ४ गडी बाद केले. त्याला अर्थव पाटीलने नाबाद २:४० मि. संरक्षण करत ३ गडी बाद करून चांगली साथ दिली, तसेच मोहन चव्हाणने २:५० मि. संरक्षण केले आणि जिशान मुलाणीने ३ गडी बाद केले. पराभूत छत्तीसगडतर्फे यशवंत कुमारने केलेले खेळ वगळता अन्य कोणालाही चांगला खेळ करता आला नाही. किशोरी गटात महाराष्ट्राने केरळ संघावर २५-०५ असा एक डाव २० गुणांनी मात केली. महाराष्ट्राने पहिल्या डावातील आक्रमणात २५ खेळाडू बाद करून केरळपुढे मोठे आव्हान ठेवले. यामध्ये अंकिता देवकरने ८ खेळाडू, तर धनश्री करेने ५ खेळाडू बाद करत चांगली कामगिरी केली. संरक्षणामध्ये अंकिता देवकरने २ मिनिटे, तर धनश्री कंकने ३:३० मि. व एक खेळाडू बाद केला आणि सानिका चाफेने २ मि. संरक्षण करत विजयांमध्ये मोलाची कामगिरी बजावली. पराभूत केरळतर्फे एस. हर्षदाने चांगली लढत दिली, तर उर्वरित खेळाडूंना जास्त काळ मैदानावर तग धरला आला नाही. त्यामुळे महाराष्ट्राला मोठा विजय साजरा करता आला.