भारतीय संघासाठी आनंदाची बातमी : केएल राहुल दुखापतीतून सावरला

सरावासाठी मैदानात दाखल
मुंबई – भारतीय क्रिकेट चाहत्यांसाठी आनंदाची बातमी आहे. दक्षिण आफ्रिकेच्या महत्त्वाच्या दौऱ्यापूर्वी संघाचा आघाडीचा सलामीवीर केएल राहुल दुखापतीतून सावरला असून, त्याने नेटमध्ये फलंदाजीही सुरू केली आहे. इंग्लंड दौऱ्यावेळी केएल राहुलने चांगली कामगिरी केली होती. डाव्या मांडीच्या स्नायूला दुखापत झाल्याने तो न्यूझीलंडविरुद्धच्या कसोटी मालिकेत बाहेर पडला होता. मात्र, आता तो बरा झाला असून, नेटमध्ये सराव करताना दिसत आहे.
राहुलने मुंबईत भारतीय संघासोबतच्या पहिल्या नेट सत्रात भाग घेतला. राहुलने ‘कू’वर एक व्हिडीओ शेअर केला आहे, ज्यामध्ये तो नेटमध्ये फलंदाजी करताना दिसत आहे. भारताचा सलामीवीर रोहित शर्माला एकदिवसीय कर्णधार बनवल्यानंतर उपकर्णधारपदाचे पद रिक्त झाले आहे. एकदिवसीय संघाच्या कर्णधारपदाबाबत अनेक तर्क-वितर्क लावले जात आहेत. केएल राहुलसह ऋषभ पंत आणि श्रेयस अय्यरकडे भारतीय एकदिवसीय संघाचे कर्णधारपद जाईल, असा कयास लावला जात आहे.
परंतु, उपकर्णधारपदाच्या शर्यतीत केएल राहुलचे पारडे जड दिसत आहे. दक्षिण आफ्रिकेविरुद्धच्या एकदिवसीय आणि टी-२० मालिकेत केएल राहुलला उपकर्णधारपदाची जबाबदारी दिली जाऊ शकते, अशी माहिती एका वृत्तात काही दिवसांपूर्वी देण्यात आली होती. भारतीय संघातील बहुतेक खेळाडू मुंबईतील एका हॉटेलमध्ये बायो-बबलमध्ये दाखल झाले आहेत. टीम इंडियाच्या दक्षिण आफ्रिका दौऱ्याला २६ डिसेंबरपासून सुरुवात होणार आहे. भारतीय संघ १६ डिसेंबरला दक्षिण आफ्रिकेला रवाना होणार आहे. ओमिक्रॉनच्या पार्श्वभूमीवर भारत दक्षिण आफ्रिका दौऱ्यातील वेळापत्रकात बदल करण्यात आले आहे. या दौऱ्यात संघाला तीन कसोटी आणि फक्त तीन एकदिवसीय सामने खेळायचे आहेत. टी-२० मालिकेबाबत बीसीसीआय लवकरच निर्णय जाहीर करणार आहे.