घाऊक महागाई दराचा चढता आलेख

  •  अन्नधान्य, भाजीपाला महागणार?

नवी दिल्ली – कोरोनाचा फटका अद्याप अर्थव्यवस्थेला बसलेला असून, देशात महागाई वाढतच चाललेली आहे. अशात घाऊक महागाईच्या दरात गेल्या नोव्हेंबर महिन्यामध्ये १.५२ टक्क्यांची वाढ झाली. ठोक महागाई १२.५४ टक्क्यांवरून थेट १४.२ टक्क्यांवर पोहोचली. पेट्रोल, डिझेल आणि विजेच्या दरामध्ये सातत्याने वाढ होत असल्यामुळे महागाईवर त्याचा मोठा परिणाम होत असल्याचे पाहायला मिळत आहे. सध्या महागाई गेल्या १२ वर्षांतील उच्चस्थरावर आहे. सप्टेंबरमध्ये ठोक महागाईचा दर १०.६६ टक्के होता, त्यामध्ये वाढ होऊन तो ऑक्टोबरमध्ये १२.५४ टक्क्यांवर पोहोचला, तर नोव्हेंबरमध्ये १४.२ टक्क्यांवर पोहचला होता.
मंगळवारी जाहीर झालेल्या नोव्हेंबर महिन्यातील आकडेवारीनुसार अन्न-धान्य आणि खाण्या-पिण्याच्या गोष्टींमध्ये ३.०६ टक्क्यांची वाढ झाली आहे. इंधन पेट्रोल आणि डिझेल यांच्या किमतीमध्ये देखील वाढ होऊन महागाईचा दर ३७.१८ टक्क्यांवरून ३९.८१ टक्क्यांवर पोहोचला आहे, तसेच भाजीपाल्याच्या ठोक किमतीमध्ये १.६८ टक्क्यांची वाढ झाली आहे. धातू आणि इतर गोष्टींचे देखील भाव वाढले आहेत. अनेक वस्तूंचा कच्चा माल वाढल्याने वस्तूंच्या किमतीमध्ये वाढ झाल्याचे पाहायला मिळत आहे. दरम्यान सरकारकडून महागाईवर नियंत्रण मिळवण्याचे प्रयत्न सुरू आहेत. भारताची मध्यवर्ती बँक असलेल्या आरबीआयचे गव्हर्नर शक्तिकांत दास यांनी याबाबत बोलताना सांगितले की, केंद्र आणि आरबीआयकडून महागाईचा दर कसा नियंत्रित राहिल यासाठी प्रयत्न सुरू आहेत. याच पार्श्वभूमीवर गेल्या चार नोव्हेंबरला पेट्रोल आणि डिझेलच्या उत्पादन शुल्कामध्ये कपात करण्यात आली होती. त्यामुळे पेट्रोल पाच रुपयांनी तर डिझेल दहा रुपयांनी स्वस्त झाले. दरम्यान, भविष्यातदेखील महागाई नियंत्रणात आणण्याच्या दृष्टिकोणातून मोठे निर्णय घेतले जाऊ शकतात, असे संकेत त्यांनी दिले आहेत.

About Sub-Editor

अवश्य वाचा

एकामागून एक हल्ल्यामुळे खारूताईची पसरली दहशत

  कोरोना विषाणूने जगात पुन्हा धुमाकूळ घातला आहे. यावेळी ओमिक्रॉनने लोकांना घाबरवले आहे. लसीकरण झालेल्या …