अजित पवारांशी संबंधित १००० कोटींची संपत्ती जप्त होणार?

मुंबई- राज्याचे उपमुख्यमंत्री अजित पवार मागील काही दिवसांपासून अजित पवार आणि त्यांच्या कुटुंबीय हे आयकर विभागाच्या रडारवर आहेत. आज आयकर विभागाकडून अजित पवारांना नोटिस देण्यात आल्याची माहिती समोर येत आहे. या कारवाईअंतर्गंत अजित पवारांशी संबंधित कोट्यवधींची संपत्ती जप्त करण्याचे आदेश देण्यात आले आहेत. त्यांच्या मालमत्तांवर आयकर विभागाची कारवाई झाली असून ९० दिवसांच्या कालावधीत प्रॉपर्टी बेनामी नसल्याची सत्यता सिद्ध करावी लागणार आहे. आयकर विभागानेचार मालमत्तांवर तात्पुरती जप्ती आणण्यात आल्याची माहिती आहे. जरंडेश्वर साखर कारखाना, दक्षिण दिल्लीतील फ्लॅट , पार्थ पवार यांचे मुंबईतील कार्यालय, गोव्यातील रिसॉर्ट, राज्यातील वेगवेगळ्या २७ जिल्ह्यातील जमीनी ही संपत्ती जवळपास १ हजार कोटींपेक्षा जास्त असल्याची माहिती आहे.दरम्यान, अजित पवार हे गेल्या काही दिवसांपासून आयकर विभागाच्या रडारवर आहेत. मागील महिन्यात आयकर विभागानं दोन रिअल इस्टेट ग्रुप आणि अजित पवार यांच्या नातेवाईकांच्या घरी धाड टाकली होती. त्यानंतर जवळपास १८४ कोटी बेनामी मालमत्ता उघड झाली होती. आयकर विभागानं ७ ऑक्टोबर रोजी ७० हून अधिक ठिकाणी धाड टाकली होती. यावेळी अजित पवार यांचे पुत्र पार्थ पवार यांच्या कार्यालयात व अजित पवारांच्या बहिणींच्या कंपन्यांवरही छापा मारला होता.